अर्जुनधारा । त्रिभुवन विश्वविद्यालयका आंगिक र सम्बन्धन प्राप्त झापाका १३ वटा क्याम्पसमध्ये शनिश्चरे बहुमुखी क्याम्पसमा अहिले ३ बजेभित्र ६२ प्रतिशत मत झरेको छ ।
बिहान ८ बजेबाट सुरु भएको स्ववियु निर्वाचनमा अहिलेसम्म २७८ मत झरेको हो । मत संख्या ४४९ रहेको सहायक क्याम्पस प्रमुख कृष्ण थापाले यलम्वर टाइम्सलाई जानकारी दिए ।
निर्वाचनमा एमाले निकट अनेरास्ववियु र नेपाली कांग्रेस निकट नेविसंघको संयुक्त प्यानल रहेको छ भने माओवादी केन्द्र निकट अनेरास्ववियु क्रान्तिकारी एक्लै प्रतिस्पर्धा गरिरहेको छ ।
मतदान शान्तिपूर्ण रहेको छ । यस क्षेत्रका अग्रज नेता माओवादी केन्द्रका हरिकुमार राना, झापा अध्यक्ष राजु आचार्य ‘अग्नी’ को उपस्थिति रहेको थियो भने एमालेका पूर्व प्रदेश सांसद तथा नगर अध्यक्ष बृख प्रधान, एकदेव खनाल लगायत थिए भने नेपाली कांग्रेसका हेमराज खरेल, महिला नेतृ सरस्वती सिटौला लगायतका नेताहरुको उपस्थिति रहेको थियो ।
मतदान क्षेत्रमा विद्यार्थी बाहेक अन्यलाई प्रवेश रोक लगाइएको थियो । प्रतिनिधि तथा निर्वाचन पर्यवेक्षक र सञ्चारकर्मीलाई भने खुला राखिएको थियो ।
प्राप्त जानकारी अनुसार गौरादह कृषि क्याम्पसमा केही ढिलो मतदान हुने बुझिएको छ । जिल्लामा राजनीतिक दल निकट र स्वतन्त्र गरी ९ विद्यार्थी समूहले निर्वाचनमा भाग लिएका छन् । झापामा अध्यक्ष पदका लागि ८ जनासम्मले उम्मेद्वारी दिएका छन् ।
सबैभन्दा धेरै दमक बहुमुखी क्याम्पसमा अध्यक्ष पदका लागि ८ जनाले उम्मेद्वारी दिएका हुन् । दमकपछि कन्काई बहुमुखी क्याम्पस सुरुङ्गामा ७ जनाले अध्यक्षमा उम्मेद्वारी दिएका छन् ।
त्यस्तै जिल्लाको सबैभन्दा पुरानो आंगिक क्याम्पस मेची बहुमुखी क्याम्पसमा ६ जनाले अध्यक्षमा उम्मेद्वारी दिएका छन् । जिल्लाका १३ वटा क्याम्पसमा ३३२ जना उम्मेद्वार प्रत्यक्षतर्फ चुनावी मैदानमा उत्रिएका छन् ।
झापामा १३ हजार ३१९ जना विद्यार्थीहरुले स्ववियू निर्वाचनमा भाग लिने भएका छन् । केही क्याम्पसमा सत्तारुढ दलनिकट नेपाल विद्यार्थी संघ र अखिल नेपाल राष्ट्रिय स्वतन्त्र विद्यार्थी यूनियनले चुनावी गठबन्धन बनाएका छन् । गरामनी क्याम्पसमा जम्मा ४० जना विद्यार्थीमध्ये २० जना उम्मेद्वार बनेका छन् ।
कुल विद्यार्थीमध्ये आधा उम्मेद्वार बनेका हुन् । नेकपा एमालेनिकट अखिल नेपाल स्वतन्त्र विद्यार्थी यूनियन , नेपाली कांग्रेसनिकट नेपाल विद्यार्थी संघ र राप्रपानिकट राष्ट्रिय प्रजातान्त्रिक विद्यार्थी संगठनले प्रत्यक्षतर्फ १५ जना र समानुपातिकतर्फ पाँचजनाको उम्मेद्वारी दिएका हुन् ।
अध्यक्ष, सचिव, कोषाध्यक्ष र केही सदस्य प्रत्यक्ष तथा उपाध्यक्ष, सहसचिवलगायत केही सदस्य समानुपातिक निर्वाचन प्रणालीअनुसार निर्वाचित हुनेछन् ।
निर्वाचन निर्देशिकामा क्याम्पसमा रहेका विद्यार्थी संख्याका आधारमा स्ववियु कार्यसमिति निर्वाचित हुने व्यवस्था छ । दुई सयसम्म विद्यार्थी रहेको क्याम्पसमा ११, दुई सयदेखि हजारसम्म विद्यार्थी रहेकामा १५, एक हजारदेखि तीन हजारसम्म भए १९ र त्यसभन्दा बढी विद्यार्थी संख्या रहेको क्याम्पसमा २१ सदस्यीय स्ववियु कार्यसमिति रहनेछ । स्ववियु कार्य समितिको कार्यकाल दुई वर्षको हुनेछ ।
२०७३ सालदेखि मिश्रित प्रणालीमा आधारित निर्वाचनको थालनी भएको हो भने उम्मेदवारको उमेरहद २८ वर्ष कायम गरिएको छ । यसअघि ५ चैत २०७९ मा ५० आंगिक र ३ सयभन्दा बढी सम्बन्धन प्राप्त क्याम्पसमा स्ववियु निर्वाचन भएको थियो, जसमा ६० प्रतिशत विद्यार्थीले मतदान गरेका थिए ।
