बुद्धशान्ति । आशा र भरोसाको केन्द्र विन्दु बनेको माओवादी केन्द्रका नेताहरु नसच्चिएसम्म पार्टी अढिलो बन्न नसक्ने पूर्वमन्त्री तथा माननिय सुदन किरातीले बताएका छन् ।
बुधबार नेकपा माओवादी केन्द्रको बुद्धशान्ति गाउँपालिकाको दोस्रो अधिवेशनलाई सम्बोधन गर्न आएका बेला उनले सो कुरा बताएका हुन् ।
माननिय किरातीले अहिले पाटीले उठाएको मुद्दा र पार्टीलाई समर्थन गर्दै थुप्रै प्रियजनहरु प्रवेश गर्दै आएको बताए ।
युवा पुस्तामा लोकप्रिय छवि बनाएका माननिय किरातीले विगत सम्झदै ०६४ मा जनताले विश्वाका साथ मत दिए पनि पार्टी जनताप्रति उत्तरदायी नहुँदा पार्टी खस्कीएको बताए ।
‘पार्टी बहुमतले सत्तामा पुग्दा हामी मातियौं यही गल्तीका कारण हामी तेस्रो स्थानमा खुम्चिनु पर्यो’ पूर्वमन्त्री किरातीले भने । उनले अब माओवादी केन्द्रका नेताहरु नसच्चिएसम्म पार्टी उचाईमा जान नसक्ने ठोकुवा गर्दै उक्त कुरा दोहोर्याए ।
तीनकुनेमा भएको राजावादीको अराजकता, वर्तमान सत्ताको उपज भएको बताउँदै दुर्गा प्रसाईलाई वर्तमान ओली सरकारको नालायकपनले लुक्न सफल भएको पनि आरोप लगाए ।
चरम गुण्डाशैलीमा दुर्गा प्रसाई आइरहेको बेला ओली सरकारको फितलोपनबाट जनता आजित भएको र नयाँ पुस्ताले राजावादीको उदण्डता देखेको हुँदा गणतन्त्रका लागि जनताले गरेको त्याग स्मरण गराउँदै सुनौलो गणतन्त्र माओवादी केन्द्रको तागतबाट उठ्ने बताए ।
‘जनता अभावले पसल लुट्न थाले, त्यो राम्रो कार्य होइन तर लुट्न जनता किन गए त्यसप्रति सरकार सम्वेदनशील हुनुपर्छ’ विशेष अतिथि समेत रहेका किरातीले भने ।
कार्यक्रममा विशेष अतिथि समेत रहेका किरातीसँग फोटो खिचाउनेहरुको भीड थियो भने प्रमुख अतिथि माननिय धर्मशिला चापागाई र विशेष अतिथि किरातीले ८० जनाभन्दा बढी नवप्रवेशीहरुलाई फूलमालाले स्वागत गरेका थिए ।
बुद्धशान्ति अध्यक्ष प्रेम नेम्वाङको सभापतित्वमा सम्पन्न उद्घाटन सभामा पार्टीका केन्द्रीय सदस्य सरु न्यौपानेले बुद्धशान्तिको अवस्था र भौगोलिकता बारे प्रस्ट्याएका थिए ।
जिल्ला संयोजक राज आचार्य ‘अग्नी’, प्रदेश सदस्य पवन तिम्सिना, महिला नेतृ तारा श्रेष्ठले बुद्धशान्तिमा जग बलियो हुँदै गएको बताए ।
दुर्गा ढुंगेलले सञ्चालन गरेको कार्यक्रममा स्वागत विरेन्द्र घतानीले गरेका थिए ।
