नेपाली राष्ट्रिय महिला फुटबल टिमकी कप्तान अञ्जिला तुम्वापो सुब्बाको वायोपिकमा आधारित फिल्म ‘अञ्जिला’ सुपर हिट बनिसकेको छ । फिल्मले व्यवसायिक सफलता हात पार्दै गर्दा दर्शकहरुसँग साक्षत्कार गर्न यति बेला अञ्जिला पूर्वका हलहरुमा पुगेकी छिन् ।
ग्रीसको निसअट्रोमिटौबाट व्यवसायिक फुटबल खेल्दै आएकी उनी दर्शकसँग भेट्नकै लागि ग्रीसबाट आएकी हुन् । शुक्रबार काठमाण्डौमा आइपुगेकी उनी फिल्म निर्माण टिमसँगै आईतबार झापाका दर्शकमाझ आइपुगेकी हुन् ।
उनी बिर्तामोडको क्यूएफएक्स, पाथिभरा सिने प्लाजा पुगेर दर्शकसँग भेटघाट गरेकी थिइन् । ‘हजुरहरु सबै जनाले साथ र सपोर्ट दिनुभयो । एकदमै खुशी लागिराखेको छ’ फिल्मकी मुख्य कलाकार तथा कप्तान तुम्बापोले दर्शकसँग भेटका क्रममा भनिन्, ‘पूर्वमा हाम्रो फिल्मको यतिधेरै क्रेज छ, यसरी नै माया गरिदिनुहोला ।’
अञ्जिलासँगै फिल्मका निर्देशक मिलन चाम्स, निर्माता तथा कलाकार प्रेमकुमार श्रेष्ठ लगायतको उपस्थिति रहेको थियो । बिर्तामोडमा दर्शकहरुसँग भेटेपछि दमक लागेकी थिइन् । फिल्ममा अञ्जिलाको बाल्यकालदेखि खेल जीवनसम्मको संघर्ष र सफलताको कथा प्रस्तुत गरिएको छ ।
फिल्ममा अञ्जिलासँगै दयाहाङ राई, प्रेमकुमार श्रेष्ठ, सुनील थापा, विजय बराल, सिर्जना सुब्बा, माओत्से गुरूङ, सुमीन गुरूङ, बुद्धि तामाङ लगायतका कलाकारहरूको अभिनय छ ।
