अर्जुनधारा । सात महिना अघि प्रेम विवाह बाँधिएकी गीता घतानी शुक्रबार आफ्नै कोठामा झुण्डिएको अवस्थामा भेटिएपछि माइती पक्षले किटानी जाहेर दिँदै उनका श्रीमान राजु कटुवाललाई कारवाही गर्न माग गरेका छन् ।
अन्तरजातीय विवाह बाँधिका ती जोडी आन्तरिक कलहमा फस्दै आएका थिए । शुक्रबार गीताले आत्माहत्या गरेको कुरा बाहिर आएपछि आमा राधिका घतानीले राजुकै कारण आत्माहत्या गरेको भन्दै इलाका प्रहरी कार्यालय बिर्तामोडमा जाहेरि दिएकी थिइन् ।
अर्जुनधारा–७ नारायण चोकमा डेरा गरि बस्दै आएका राजु इलाम गोर्खे निवासी हुन् । उनका बहिनी नाताबाट झापा झरेका राजुले अर्जुनधारा–७ कै जरुवाबस्तीकी गीतासँग गत माघ महिनामा विवाह गरेका थिए ।
यस अघि जे जस्तो भए पनि सँगै बस्ने, सँगै जीउने वाचाका साथ नयाँ जीवनमा प्रवेश गरेका ती जोडी के कारणबाट विवाद मुछिए ? यकिन हुन बाँकी नै छ ।
राजुको जेठी श्रीमतीसँगै सन्तान भएको उल्लेख छ भने गीताको पनि यस अघि नै विवाह भइ एक सन्तान रहेको स्थानीय बताउँछन् ।
शुक्रबार यसरी गीताले आत्माहत्या गरेको विषयमा स्थानीयले उनका श्रीमानकै दोष रहेको भन्दै आक्रमण समेत गरेका थिए ।
गाउँलेहरुको उपस्थितिमा राजुलाई प्रहरीको जिम्मा लगाइएको थियो भने कडा कारवाहीको माग गरिएको गीताका भाइ मणि शंकरले बताए ।
राजुलाई हाल इलाका प्रहरी कार्यालय बिर्तामोडमा अनुसन्धानका लागि राखिएको छ भने गीताको पोष्टमाटमपछि कानकाई माईमा दाहसंस्कार गरिएको थियो ।
