बिर्तामोड । प्रथम झापा कप २०८१ को अन्तिम सेमिफाइनल खेल शनिबार (आज) राष्ट्रिय जागृति (राजा) क्लब इटहरी र न्यु रोड टिम (एनआरटी) बीच हुँदैछ ।
पहिलो चरणको खेलमा आयोजक झापा ११ लाई घरेलु मैदानमै हराएर क्वार्टर फाइनल प्रवेश गरेको राजा क्लब भारतीय टिम जिटिए दार्जिलिङलाई रोक्दै सेमिफाइनलमा पुगेको हो ।
गत वर्ष चैतको इटहरी गोल्डकपमा भारत दार्जिलिङको कञ्चनजंघा फुटबल क्लबलाई टाइब्रेकरमा हराएको राजा क्लब बैशाखमा भएको भीमनारायण गोल्डकपको अन्तिम चारमा पुगेको थियो ।
डोमालाल राजवंशी रंगशाला बिर्तामोडमा मंसिर अन्तिम साता भएको इलाम गोल्डकपको च्याम्पियन एनआरटी काठमाडौँ जिल्ला लिग विजेता चित्लाङलाई हराउँदै सेमिफाइनल प्रवेश गरेको हो ।
पाँच पटकको ए डिभिजन लिग च्याम्पियन एनआरटी गत सिजनको मकवानपुर गोल्डकपको उपविजता टिम हो ।
यसअघिको सेमिफाइनल खेलमा चर्च ब्वाइज युनाइटेडले सलहेश युवा क्लब १–० गोलले पराजित गर्दै फाइनलमा स्थान पक्का गरिसकेको छ ।
