बिर्तामोड । मंगलबार साँझ देशव्यापी राँके जुलुस निकालेर उज्यालो प्रकाश छर्नेलाई हटाएर किन अध्याँरोतर्फ मुलुकलाई लान्छौं सरकार ? भन्दै विरोध प्रदर्शन भएको थियो ।
सोमबार कुलमान घिसिङलाई सरकारले हटाएपछि यस्तो देशव्यापी विरोध प्रदर्शन भएको थियो । छोटो समयमा उज्यालो प्रकाश छर्ने र सरकारलाई विद्युत प्राविधिकरणमार्फत नाफामा लैजाने एक कुशल प्रशासकको समर्थनमा प्रदर्शन भएको हो ।
कुलमानलाई निकाल्न एमाले–कांग्रेसको गठबन्धनकबाट बनेको ओली सरकारको एक सुत्रीय माग रहेता पनि कांग्रेस महामन्त्री गगन थापा र विश्वप्रकाश शर्माले कुलमानलाई हटाउन नहुने तर्क राखेका थिए ।
उता गृहमन्त्री रमेश लेखकले पनि कुलमानलाई हटाउन नहुने धारणा राखेका थिए, तर उर्जामन्त्री दीपक खड्काले कुन तागत प्रयोग गरेर हो हटाइ छाडे । त्यसैको विरुद्धमा नेकपा माओवादी केन्द्रका भातृ संगठन तथा पहिचानवादी समूहले पश्चिम बस स्टाण्डबाट राँके जुलुस निकालेर विरोध जनाएका छन् ।
ओली सरकार मुर्दावाद, भ्रष्टाचारी सरकार चाहिँदैन, इमान्दार प्रशासकलाई निकाल्न पाइदैन भन्ने नारा लगाउँदै बिर्तामोड स्थित मुक्ति चोकमा पुगेर कोणसभा गरेका थिए ।
अखिल क्रान्तिकारीका जिल्ला सचिव गगन चापागाईले सञ्चालन गरेको कार्यक्रममा मजदुर नेता भुपाल सापकोटा, निरु कडरिया लगायतले सम्बोधन गरेका थिए ।
राँके जुलुसमा पहिचानवादी नेता तथा मुक्कुम्लुङका झापा संयोजक हिमाल कन्दङ्वा, माओवादी केन्द्रका संयोजक राजु आचार्य ‘अग्नी’, जेवी जवेगु, गणेश कालिकोटे, विद्यार्थी नेताहरु लगायतको उपस्थिति रहेको थियो ।
प्रहरीले राँके जुलुसलाई रोकछेक गरे पनि प्रदर्शनकारीले मुक्ति चोकमा सभा गर्दै सरकारलाई सचेत गराएका थिए ।
