अर्जुनधारा । शनिश्चरे–अर्जुनधारा खानेपानी तथा सरसफाई उपभोक्ता समितिका अध्यक्ष किरण शिवाकोटीले संस्थाले उपभोक्ताहरु लाभान्वित हुने विभिन्न कामहरु गर्दै आएको बताएका छन् ।
२०७८ फाल्गुनमा आफू नेतृत्वको टिम निर्वाचित भएर आएपछि गरेका कामहरु सार्वजनिक गर्दै संस्थाबाट उपभोक्ता हितका काम हुँदै आएको बताएका हुन् ।
खानेपानी कार्यालय परिषरमा पत्रकारहरुसँग भेटपछि तीन वर्षको अवधिभित्र गरेका कामहरु बुँदागत रुपमा प्रस्तुत गर्दै अध्यक्ष शिवाकोटीले अर्जुनधारा नगर क्षेत्रका सडकको दुवैतर्फ खानेपानी पाइप लाइन विस्तार गरिदै आएको जानकारी दिए ।
उनका अनुसार संघीय सरकारसँगको डेलिगेशन पश्चात १८ करोडको वृहत खानेपानी आयोजनाको ठेक्का लागेर पाइप विछ्याउने काम भइरहेको छ । २०८३ को अन्त्यसम्म सम्पन्न गर्ने लक्ष्य सहित सडकको दुवैतर्फ १८० किलोमिटर पाइप विस्तार गरिने छ ।
उक्त आयोजना अन्तर्गत नै एक थान डिप बोरिङ, भवन निर्माण, एक थान जेनेरेटर, विद्युत ट्रान्सफर्मर एक थान, ट्रिटमेन्ट प्लान्ट एक थान र नगरका १२ स्थानमा फायर हाइडे«न जडान गर्ने ठेक्का लागेको जनाए ।
फायर हाइड्रेन खासगरी दमकल पुग्ने नसक्ने स्थानमा जडान गरिने गरिन्छ । त्यस्ता स्थानमा आगलागी हुँदा हुन सक्ने सम्भावित दुर्घटनाबाट बच्न सकिने उनको भनाइ छ । अध्यक्ष शिवाकोटीका अनुसार नगरका लागि १२ वटा हाइड्रेन अपुग हुने हुँदा स्थानीय सरकार, वडाध्यक्षसँग पनि छलफल गरिनेछ ।
यस्तै संस्थाको सामाजिक दायित्व अन्तर्गत नगरकै एकमात्र बहुमुखी क्याम्पस शनिश्चरे क्याम्पससँगै कप्तनबारी स्थित अपाङ्ग बालशिक्षा सरोकार केन्द्रमा निःशुल्क धारा जडान गरिएको अध्यक्ष शिवाकोटीले सुनाए । शान्ति सुरक्षामा खटिने सशस्त्र प्रहरी बेश क्याम्पमा पनि निःशुल्क धारा जडान गर्ने निर्णय भएको बताए ।
संस्थाले खानेपानीमा सबैको पहुँच पुगोस् भन्ने उद्देश्यले विपन्न वर्ग, अपाङ्ग असक्त र ज्येष्ठ नागरिक संस्थाहरुलाई धारा जडानका लागि २५ प्रतिशत छुट दिँदै आएको छ ।
उपभोक्ताकै हितलाई मध्यनजर धारा जडान शुल्क र न्यूनतम महशुलमा पनि कटौती गरेको अध्यक्ष शिवाकोटीले जानकारी दिए ।
संस्थाले नयाँ धारा जडान शुल्कलाई ९ हजार ९ सय ९९ मा घटाएको छ भने नयाँ वर्ष २०८२ बैशाख १ गतेबाट लागू हुने गरी पानीको न्यूनतम महशुल १३० रुपैयाँमात्र तोकेको छ ।
यसअघि संस्थाले न्यूनतम ८ युनिट पानीको महशुल १५० रुपैयाँ लिदै आएको थियो । ८ युनिट बराबर ८ हजार लिटर पानी हुन्छ ।
यस्तै आर्थिक अवस्थाकै कारण शुद्ध खानेपानीको पहुँचबाट हुन नपरोस् भनी धारा जडानका लागि किस्ता बन्दि सेवा सुचारु गरेको समितिले जनाएको छ । समिति मातहतका दुवै ट्यांकीमा दियालो प्रविधि जडान गरिएको जनाकारी दिइएको थियो ।
भेटघाट कार्यक्रममा समितिका अध्यक्ष शिवाकोटीसँगै सचिव राकेश ढकाल, सदस्यहरु सरु बुढाथोकी, देवकला प्रसाई, तुलाराम दाहाल लगायतको उपस्थिति रहेको थियो । समितिको कार्यकाल चार वर्षको रहनेछ ।
