अर्जुनधारा । अर्जुनधारा नगरपालिका वडा नं. ७ विरिङ नजिकको खेल मैदानको स्तरोन्नतिका लागि ७१ लाख विनियोजन भएको छ ।
खोला किनारमा निर्माण हुँदै आएको खेल मैदानको संरक्षण समाज उद्धार कल्याण संघले गर्दै आएको हो ।
उक्त खेल मैदानमा समाज उद्धार कल्याण संघ र स्थानीय नेता तथा वडाको पहलमा योजना अनुसार पहिलो चरण खेल मैदानको परिसरलाई घेराबारा गर्नका लागि सो रकम विनियोजन भएको सचिव मेधनी ढुंगेलले यलम्वर टाइम्सलाई बताए ।
स्वास्थ्य नै अमूल्य धन भएको हुँदा यस क्षेत्रको खेल प्रेमी महानुभावहरुलाई ध्यानमा राख्दै संघले खेल मैदानलाई उच्च प्राथमिकता दिँदै आएको थियो ।
एक हप्ता यताबाट उक्त खेल मैदानको परिसरमा घेराबारा लगाउने काम हुँदै आएको छ । संघका कार्यवाहक अध्यक्ष कमल सुवेदीका अनुसार खेल मैदानलाई संरक्षण र राम्रोसँग विकास गर्दै लगे रंगशाला निर्माण गर्न सकिने जनाए ।
५ कठ्ठा ८ धुरमा रहेको सो खेल मैदान असार मसान्तसम्म घेराबारा गरिसकिने जानकारी दिए ।
खेल मैदानमा दैनिक सयभन्दा बढी फुटबल, तेक्वान्दो, र क्रिकेट खेल्नेहरुको जमघट हुने गरेको छ ।
